ພັຍ ໓ ຢ່າງ ທີ່ເປັນອະມາຕາປຸຕຕິກະພັຍ

The Buddha's words

ອັງຄຸຕຕະຣະນິກາຍ ເອກ-ທຸກ-ຕິກະນິບາຕ ໒໐/໑໗໐-໑໗໓/໕໐໒

Photo by Daiga Ellaby on Unsplash

ພິກຂຸທັງຫລາຍ! ປຸຖຸຊົນຜູ້ບໍ່ໄດ້ສະດັບ ຍ່ອມກ່າວພັຍ ໓ ຢ່າງນີ້ວ່າ ເປັນອະມາຕາປຸຕຕິກະພັຍ. ພັຍ ໓ ຢ່າງເປັນຢ່າງໃດ?

ພິກຂຸທັງຫລາຍ! ສມັຍທີ່ມີກາຣເກີດໄຟໃໝ້ໃຫຍ່ ເມື່ອເກີດໄຟໃໝ້ໃຫຍ່ແລ້ວ ແມ່ນແຕ່ບ້ານກໍຖືກໄຟເຜົາ ແມ່ນແຕ່ນິຄົມກໍຖືກໄຟເຜົາ ແມ່ນແຕ່ນະຄອຣກໍຖືກໄຟເຜົາ, ເມື່ອບ້ານກໍດີ ນິຄົມກໍດີ ນະຄອຣກໍດີຖືກໄຟເຜົາຢູ່ ໃນທີ່ນັ້ນໆ ແມ່ນແຕ່ມາຣດາກໍບໍ່ພົບບຸຕ ແມ່ນແຕ່ບຸຕກໍບໍ່ພົບມາຣດາ. ພິກຂຸທັງຫລາຍ ປຸຖຸຊົນຜູ້ບໍ່ໄດ້ສະດັບ ຍ່ອມກ່າວພັຍຂໍ້ທີ ໑ ນີ້ວ່າ ເປັນອະມາຕາປຸຕຕິກະພັຍ.

ພິກຂຸທັງຫລາຍ! ອີກປະກາຣໜຶ່ງ ສມັຍທີ່ມະຫາເມກຕັ້ງຂຶ້ນມີຢູ່ ເມື່ອມະຫາເມກຕັ້ງຂຶ້ນແລ້ວ ຍ່ອມເກີດຫ້ວງນ້ຳໃຫຍ່ ເມື່ອເກີດຫ້ວງນ້ຳໃຫຍ່ແລ້ວ ແມ່ນແຕ່ບ້ານກໍຖືກນ້ຳພັດໄປ ແມ່ນແຕ່ນິຄົມກໍຖືກນ້ຳພັດໄປ ແມ່ນແຕ່ນະຄອຣກໍຖືກນ້ຳພັດໄປ, ເມື່ອບ້ານກໍດີ ນິຄົມກໍດີ ນະຄອຣກໍດີຖືກນ້ຳພັດໄປ ໃນທີ່ນັ້ນໆ ແມ່ນແຕ່ມາຣດາກໍບໍ່ພົບບຸຕ ແມ່ນແຕ່ບຸຕກໍບໍ່ພົບມາຣດາ. ພິກຂຸທັງຫລາຍ ປຸຖຸຊົນຜູ້ບໍ່ໄດ້ສະດັບ ຍ່ອມກ່າວພັຍຂໍ້ທີ ໒ ນີ້ວ່າ ເປັນອະມາຕາປຸຕຕິກະພັຍ.

ພິກຂຸທັງຫລາຍ! ອີກປະກາຣໜຶ່ງ ສມັຍທີ່ມີພັຍຄືໂຈຣປ່າກຳເຣີບ ພວກຊາວຊົນບົທຕ່າງພາກັນຂຶ້ນຍານໜີໄປ ໃນທີ່ນັ້ນໆ ແມ່ນແຕ່ມາຣດາກໍບໍ່ພົບບຸຕ ແມ່ນແຕ່ບຸຕກໍບໍ່ພົບມາຣດາ. ພິກຂຸທັງຫລາຍ ປຸຖຸຊົນຜູ້ບໍ່ໄດ້ສະດັບ ຍ່ອມກ່າວພັຍຂໍ້ທີ ໓ ນີ້ວ່າ ເປັນອະມາຕາປຸຕຕິກະພັຍ.

ພິກຂຸທັງຫລາຍ! ປຸຖຸຊົນຜູ້ບໍ່ໄດ້ສະດັບ ຍ່ອມກ່າວພັຍ ໓ ຢ່າງນີ້ແລວ່າ ເປັນອະມາຕາປຸຕຕິກະພັຍ. ພິກຂຸທັງຫລາຍ ແຕ່ປຸຖຸຊົນຜູ້ບໍ່ໄດ້ສະດັບ ຍ່ອມກ່າວສະມາຕາປຸຕຕິກະພັຍແທ້ໆ ໓ ຢ່າງນີ້ແລວ່າ ເປັນອະມາຕາປຸຕຕິກະພັຍ. ພັຍ ໓ ຢ່າງເປັນຢ່າງໃດ?

ພິກຂຸທັງຫລາຍ! ສມັຍທີ່ມີກາຣເກີດໄຟໃໝ້ໃຫຍ່ ເມື່ອເກີດໄຟໃໝ້ໃຫຍ່ແລ້ວ ແມ່ນແຕ່ບ້ານກໍຖືກໄຟເຜົາ ແມ່ນແຕ່ນິຄົມກໍຖືກໄຟເຜົາ ແມ່ນແຕ່ນະຄອຣກໍຖືກໄຟເຜົາ, ເມື່ອບ້ານກໍດີ ນິຄົມກໍດີ ນະຄອຣກໍດີຖືກໄຟເຜົາຢູ່, ສມັຍທີ່ມາຣດາກໍພົບບຸຕ ແມ່ນແຕ່ບຸຕກໍພົບມາຣດາ ເປັນບາງຄັ້ງບາງແຫ່ງມີຢູ່ ພິກຂຸທັງຫລາຍ ປຸຖຸຊົນຜູ້ບໍ່ໄດ້ສະດັບ ຍ່ອມກ່າວສະມາຕາປຸຕຕິກະພັຍແທ້ໆ ຂໍ້ທີ ໑ ນີ້ວ່າ ເປັນອະມາຕາປຸຕຕິກະພັຍ.

ພິກຂຸທັງຫລາຍ! ອີກປະກາຣໜຶ່ງ ສມັຍທີ່ມະຫາເມກຕັ້ງຂຶ້ນມີຢູ່ ເມື່ອມະຫາເມກຕັ້ງຂຶ້ນແລ້ວ ຍ່ອມເກີດຫ້ວງນ້ຳໃຫຍ່ ເມື່ອເກີດຫ້ວງນ້ຳໃຫຍ່ແລ້ວ ແມ່ນແຕ່ບ້ານກໍຖືກນ້ຳພັດໄປ ແມ່ນແຕ່ນິຄົມກໍຖືກນ້ຳພັດໄປ ແມ່ນແຕ່ນະຄອຣກໍຖືກນ້ຳພັດໄປ, ເມື່ອບ້ານກໍດີ ນິຄົມກໍດີ ນະຄອຣກໍດີຖືກນ້ຳພັດໄປຢູ່, ສມັຍທີ່ມາຣດາກໍພົບບຸຕ ແມ່ນແຕ່ບຸຕກໍພົບມາຣດາ ເປັນບາງຄັ້ງບາງແຫ່ງມີຢູ່ ພິກຂຸທັງຫລາຍ ປຸຖຸຊົນຜູ້ບໍ່ໄດ້ສະດັບ ຍ່ອມກ່າວສະມາຕາປຸຕຕິກະພັຍແທ້ໆ ຂໍ້ທີ ໒ ນີ້ວ່າ ເປັນອະມາຕາປຸຕຕິກະພັຍ.

ພິກຂຸທັງຫລາຍ! ອີກປະກາຣໜຶ່ງ ສມັຍທີ່ມີພັຍຄືໂຈຣປ່າກຳເຣີບ ພວກຊາວຊົນບົທຕ່າງພາກັນຂຶ້ນຍານໜີໄປ, ສມັຍທີ່ມາຣດາກໍພົບບຸຕ ແມ່ນແຕ່ບຸຕກໍພົບມາຣດາ ເປັນບາງຄັ້ງບາງແຫ່ງມີຢູ່ ພິກຂຸທັງຫລາຍ ປຸຖຸຊົນຜູ້ບໍ່ໄດ້ສະດັບ ຍ່ອມກ່າວສະມາຕາປຸຕຕິກະພັຍແທ້ໆ ຂໍ້ທີ ໓ ນີ້ວ່າ ເປັນອະມາຕາປຸຕຕິກະພັຍ.

ພິກຂຸທັງຫລາຍ! ປຸຖຸຊົນຜູ້ບໍ່ໄດ້ສະດັບ ຍ່ອມກ່າວສະມາຕາປຸຕຕິກະພັຍແທ້ໆ ໓ ຢ່າງນີ້ແລວ່າ ເປັນອະມາຕາປຸຕຕິກະພັຍ.

ພິກຂຸທັງຫລາຍ! ພັຍ ໓ ຢ່າງນີ້ ເປັນອະມາຕາປຸຕຕິກະພັຍ, ໓ ຢ່າງນັ້ນເປັນຢ່າງໃດ? ຄື: ພັຍຄືຄວາມແກ່, ພັຍຄືຄວາມເຈັບໄຂ້, ພັຍຄືຄວາມຕາຍ.

ພິກຂຸທັງຫລາຍ! ເມື່ອບຸຕແກ່ ມາຣດາຍ່ອມບໍ່ໄດ້ຕາມໃຈຫວັງດັ່ງນີ້ວ່າ ເຮົາຈົ່ງແກ່ ບຸຕຂອງເຮົາຢ່າໄດ້ແກ່ເລີຍ ຫລືວ່າ ເມື່ອມາຣດາແກ່ ບຸຕຍ່ອມບໍ່ໄດ້ຕາມໃຈຫວັງດັ່ງນີ້ວ່າ ເຮົາຈົ່ງແກ່ ມາຣດາຂອງເຮົາຢ່າໄດ້ແກ່ເລີຍ.

ເມື່ອບຸຕເຈັບໄຂ້ ມາຣດາຍ່ອມບໍ່ໄດ້ຕາມໃຈຫວັງດັ່ງນີ້ວ່າ ເຮົາຈົ່ງເຈັບໄຂ້ ບຸຕຂອງເຮົາຢ່າໄດ້ເຈັບໄຂ້ເລີຍ ຫລືວ່າ ເມື່ອມາຣດາເຈັບໄຂ້ ບຸຕຍ່ອມບໍ່ໄດ້ຕາມໃຈຫວັງດັ່ງນີ້ວ່າ ເຮົາຈົ່ງເຈັບໄຂ້ ມາຣດາຂອງເຮົາຢ່າໄດ້ເຈັບໄຂ້ເລີຍ.

ເມື່ອບຸຕກຳລັງຈະຕາຍ ມາຣດາຍ່ອມບໍ່ໄດ້ຕາມໃຈຫວັງດັ່ງນີ້ວ່າ ເຮົາຈົ່ງຕາຍ ບຸຕຂອງເຮົາຢ່າໄດ້ຕາຍເລີຍ ຫລືວ່າ ເມື່ອມາຣດາກຳລັງຈະຕາຍ ບຸຕຍ່ອມບໍ່ໄດ້ຕາມໃຈຫວັງດັ່ງນີ້ວ່າ ເຮົາຈົ່ງຕາຍ ມາຣດາຂອງເຮົາຢ່າໄດ້ຕາຍເລີຍ.

ພິກຂຸທັງຫລາຍ! ພັຍ ໓ ຢ່າງນີ້ແລ ເປັນອະມາຕາປຸຕຕິກະພັຍ.

ພິກຂຸທັງຫລາຍ! ມັຄຄາປະຕິປະທາເຊິ່ງເປັນໄປເພື່ອລະ ເພື່ອກ້າວລ່ວງສະມາຕາປຸຕຕິກະພັຍ ໓ ຢ່າງນີ້ ແລະອະມາຕາປຸຕຕິກະພັຍ ໓ ຢ່າງນີ້ ມີຢູ່. ພິກຂຸທັງຫລາຍ ກໍມັຄຄາປະຕິປະທາເຊິ່ງເປັນໄປເພື່ອລະ ເພື່ອກ້າວລ່ວງສະມາຕາປຸຕຕິກະພັຍ ໓ ຢ່າງນີ້ ແລະອະມາຕາປຸຕຕິກະພັຍ ໓ ຢ່າງນີ້ເປັນຢ່າງໃດ? ຄື: ອະຣິຍະມັຄອັນປະກອບດ້ວຍອົງຄ໌ ໘ ນີ້ແລ ກ່າວຄື ສັມມາທິຕຖິ ສັມມາສັງກັປປະ ສັມມາວາຈາ ສັມມາກັມມັນຕະ ສັມມາອາຊີວະ ສັມມາວາຍາມະ ສັມມາສະຕິ ສັມມາສະມາທິ. ພິກຂຸທັງຫລາຍ ມັຄຄາປະຕິປະທາເຊິ່ງເປັນໄປເພື່ອລະ ເພື່ອກ້າວລ່ວງສະມາຕາປຸຕຕິກະພັຍ ໓ ຢ່າງ ແລະອະມາຕາປຸຕຕິກະພັຍ ໓ ຢ່າງ ເປັນຢ່າງນີ້ແລ.