ອະນຸຕຕະຣິຍະ ໖

The Buddha's words

ອັງຄຸຕຕະຣະນິກາຍ ປັນຈະກະ-ສັກກະນິບາຕ ໒໒/໒໙໖-໒໙໙/໓໐໑

ພິກຂຸທັງຫລາຍ! ອະນຸຕຕະຣິຍະ ໖ ປະກາຣນີ້; ໖ ປະກາຣເປັນຢ່າງໃດ? ຄື:

ທັສສະນານຸຕຕະຣິຍະ (ກາຣເຫັນທີ່ເລີດ)

ສະວະນານຸຕຕະຣິຍະ (ກາຣຟັງທີ່ເລີດ)

ລາພານຸຕຕະຣິຍະ (ກາຣໄດ້ທີ່ເລີດ)

ສິກຂານຸຕຕະຣິຍະ (ກາຣສຶກສາທີ່ເລີດ)

ປາຣິຈະຣິຍານຸຕຕະຣິຍະ (ກາຣບຳຣຸງທີ່ເລີດ)

ອະນຸສສະຕານຸຕຕະຣິຍະ (ກາຣຣະນຶກທີ່ເລີດ)

ພິກຂຸທັງຫລາຍ! ກໍທັສສະນານຸຕຕະຣິຍະເປັນຢ່າງໃດ? ພິກຂຸທັງຫລາຍ ບຸຄຄົລບາງຄົນໃນໂລກນີ້ ຍ່ອມໄປເບິ່ງຊ້າງແກ້ວແດ່ ມ້າແກ້ວແດ່ ມະນີແກ້ວແດ່ ຍ່ອມໄປເພື່ອເຫັນສິ່ງທີ່ໃຫຍ່ແດ່ນ້ອຍແດ່ (ອຸຈຈາວະຈັງ ວາ ປະນະ ທັສສະນາຍະ ຄັຈສະຕິ) ຫລືໄປເພື່ອເຫັນສະມະນະຫລືພຣາມຜູ້ເຫັນຜິດ ປະຕິບັຕຜິດແດ່. ພິກຂຸທັງຫລາຍ ທັສສະນະ (ກາຣເຫັນ) ນັ້ນມີຢູ່ ເຮົາບໍ່ກ່າວວ່າບໍ່ມີ ແຕ່ວ່າທັສສະນະນີ້ນັ້ນແລເປັນຂອງຕ່ຳຊາມ ເປັນຂອງຊາວບ້ານ ເປັນຂອງປຸຖຸຊົນ ບໍ່ປະເສີດ ບໍ່ປະກອບດ້ວຍປະໂຍຊນ໌ ບໍ່ເປັນໄປເພື່ອຄວາມເບື່ອໜ່າຍ ເພື່ອຄວາມຄາຍກຳນັດ ເພື່ອຄວາມດັບ ເພື່ອຄວາມສງົບ ເພື່ອຄວາມຮູ້ຍິ່ງ ເພື່ອກາຣຕຣັສຮູ້ ເພື່ອນິພພານ.

ພິກຂຸທັງຫລາຍ! ສ່ວນຜູ້ໃດມີສັທທາຕັ້ງໝັ້ນ ມີຄວາມຮັກຕັ້ງໝັ້ນ ມີສັທທາບໍ່ຫວັ່ນໄຫວ ມີຄວາມເຫລື້ອມໃສຢ່າງຍິ່ງ ຍ່ອມໄປເພື່ອເຫັນຕະຖາຄົຕ ຫລືສາວົກຂອງຕະຖາຄົຕ, ກາຣເຫັນນີ້ເລີດກວ່າກາຣເຫັນທັງຫລາຍ ຍ່ອມເປັນໄປເພື່ອຄວາມບໍຣິສຸທຂອງສັຕທັງຫລາຍ ເພື່ອກ້າວລ່ວງຄວາມໂສກແລະປະຣິເທວະ ເພື່ອຄວາມດັບສູນແຫ່ງທຸກຂ໌ແລະໂທມະນັສ ເພື່ອບັນລຸຍາຍະທັມ ເພື່ອກະທຳໃຫ້ແຈ້ງເຊິ່ງນິພພານ.

ພິກຂຸທັງຫລາຍ! ຂໍ້ທີ່ບຸຄຄົລຜູ້ມີສັທທາຕັ້ງໝັ້ນ ມີຄວາມຮັກຕັ້ງໝັ້ນ ມີສັທທາບໍ່ຫວັ່ນໄຫວ ມີຄວາມເຫລື້ອມໃສຢ່າງຍິ່ງ ຍ່ອມໄປເພື່ອເຫັນຕະຖາຄົຕ ຫລືສາວົກຂອງ ຕະຖາຄົຕ ນີ້ເຮົາຮຽກວ່າ ທັສສະນານຸຕຕະຣິຍະ, ທັສສະນານຸຕຕະຣິຍະເປັນດັ່ງນີ້.

ພິກຂຸທັງຫລາຍ! ກໍສະວະນານຸຕຕະຣິຍະເປັນຢ່າງໃດ? ຄື ບຸຄຄົລບາງຄົນໃນໂລກນີ້ ຍ່ອມໄປເພື່ອຟັງສຽງກອງແດ່ ສຽງພິນແດ່ ສຽງເພງຂັບແດ່ ຫລືສຽງສູງໆຕ່ຳໆແດ່ ຍ່ອມໄປເພື່ອຟັງທັມຂອງສະມະນະຫລືພຣາມຜູ້ເຫັນຜິດ ຜູ້ປະຕິບັຕຜິດແດ່. ພິກຂຸທັງຫລາຍ ກາຣຟັງນີ້ມີຢູ່ ເຮົາບໍ່ກ່າວວ່າບໍ່ມີ ແຕ່ວ່າກາຣຟັງນີ້ນັ້ນແລເປັນຂອງຕ່ຳຊາມ ເປັນຂອງຊາວບ້ານ ເປັນຂອງປຸຖຸຊົນ ບໍ່ປະເສີດ ບໍ່ປະກອບດ້ວຍປະໂຍຊນ໌ ບໍ່ເປັນໄປເພື່ອຄວາມເບື່ອໜ່າຍ ເພື່ອຄວາມຄາຍກຳນັດ ເພື່ອຄວາມດັບ ເພື່ອຄວາມສງົບ ເພື່ອຄວາມຮູ້ຍິ່ງ ເພື່ອກາຣຕຣັສຮູ້ ເພື່ອນິພພານ.

ພິກຂຸທັງຫລາຍ! ສ່ວນຜູ້ໃດມີສັທທາຕັ້ງໝັ້ນ ມີຄວາມຮັກຕັ້ງໝັ້ນ ມີສັທທາບໍ່ຫວັ່ນໄຫວ ມີຄວາມເຫລື້ອມໃສຢ່າງຍິ່ງ ຍ່ອມໄປເພື່ອຟັງທັມຂອງຕະຖາຄົຕ ຫລືສາວົກຂອງຕະຖາຄົຕ, ກາຣຟັງນີ້ເລີດກວ່າກາຣຟັງທັງຫລາຍ ຍ່ອມເປັນໄປເພື່ອຄວາມບໍຣິສຸທຂອງສັຕທັງຫລາຍ ເພື່ອກ້າວລ່ວງຄວາມໂສກແລະປະຣິເທວະ ເພື່ອຄວາມດັບສູນແຫ່ງທຸກຂ໌ແລະໂທມະນັສ ເພື່ອບັນລຸຍາຍະທັມ ເພື່ອກະທຳໃຫ້ແຈ້ງເຊິ່ງນິພພານ.

ພິກຂຸທັງຫລາຍ! ຂໍ້ທີ່ບຸຄຄົລຜູ້ມີສັທທາຕັ້ງໝັ້ນ ມີຄວາມຮັກຕັ້ງໝັ້ນ ມີສັທທາບໍ່ຫວັ່ນໄຫວ ມີຄວາມເຫລື້ອມໃສຢ່າງຍິ່ງ ຍ່ອມໄປເພື່ອຟັງທັມຂອງຕະຖາຄົຕ ຫລືສາວົກຂອງຕະຖາຄົຕ ນີ້ເຮົາຮຽກວ່າ ສະວະນານຸຕຕະຣິຍະ. ທັສສະນານຸຕຕະຣິຍະ ສະວະນານຸຕຕະຣິຍະເປັນດັ່ງນີ້.

ພິກຂຸທັງຫລາຍ! ກໍລາພານຸຕຕະຣິຍະເປັນຢ່າງໃດ? ຄື ບຸຄຄົລບາງຄົນໃນໂລກນີ້ ຍ່ອມໄດ້ລາພຄື ບຸຕແດ່ ພະຣິຍາແດ່ ຊັພຍ໌ແດ່ ຫລືລາພຫລາຍແດ່ ໜ້ອຍແດ່ ຫລືໄດ້ສັທທາໃນສະມະນະຫລືພຣາມຜູ້ເຫັນຜິດ ຜູ້ປະຕິບັຕຜິດແດ່. ພິກຂຸທັງຫລາຍ ລາພນີ້ມີຢູ່ ເຮົາບໍ່ກ່າວວ່າບໍ່ມີ ແຕ່ວ່າລາພນີ້ເປັນຂອງຕ່ຳຊາມ ເປັນຂອງຊາວບ້ານ ເປັນຂອງປຸຖຸຊົນ ບໍ່ປະເສີດ ບໍ່ປະກອບດ້ວຍປະໂຍຊນ໌ ບໍ່ເປັນໄປເພື່ອຄວາມເບື່ອໜ່າຍ ເພື່ອຄວາມຄາຍກຳນັດ ເພື່ອຄວາມດັບ ເພື່ອຄວາມສງົບ ເພື່ອຄວາມຮູ້ຍິ່ງ ເພື່ອກາຣຕຣັສຮູ້ ເພື່ອນິພພານ.

ພິກຂຸທັງຫລາຍ! ສ່ວນຜູ້ໃດມີສັທທາຕັ້ງໝັ້ນ ມີຄວາມຮັກຕັ້ງໝັ້ນ ມີສັທທາບໍ່ຫວັ່ນໄຫວ ມີຄວາມເຫລື້ອມໃສຢ່າງຍິ່ງ ຍ່ອມໄດ້ສັທທາໃນຕະຖາຄົຕ ຫລືສາວົກຂອງຕະຖາຄົຕ, ກາຣໄດ້ນີ້ເລີດກວ່າກາຣໄດ້ທັງຫລາຍ ຍ່ອມເປັນໄປເພື່ອຄວາມບໍຣິສຸທຂອງສັຕທັງຫລາຍ ເພື່ອກ້າວລ່ວງຄວາມໂສກແລະປະຣິເທວະ ເພື່ອຄວາມດັບສູນແຫ່ງທຸກຂ໌ແລະໂທມະນັສ ເພື່ອບັນລຸຍາຍະທັມ ເພື່ອກະທຳໃຫ້ແຈ້ງເຊິ່ງນິພພານ.

ພິກຂຸທັງຫລາຍ! ຂໍ້ທີ່ບຸຄຄົລຜູ້ມີສັທທາຕັ້ງໝັ້ນ ມີຄວາມຮັກຕັ້ງໝັ້ນ ມີສັທທາບໍ່ຫວັ່ນໄຫວ ມີຄວາມເຫລື້ອມໃສຢ່າງຍິ່ງ ຍ່ອມໄດ້ສັທທາໃນຕະຖາຄົຕ ຫລືສາວົກຂອງ ຕະຖາຄົຕ ນີ້ເຮົາຮຽກວ່າ ລາພານຸຕຕະຣິຍະ; ທັສສະນານຸຕຕະຣິຍະ ສະວະນານຸຕຕະຣິຍະ ລາພານຸຕຕະຣິຍະເປັນດັ່ງນີ້.

ພິກຂຸທັງຫລາຍ! ກໍສິກຂານຸຕຕະຣິຍະເປັນຢ່າງໃດ? ຄື ບຸຄຄົລບາງຄົນໃນໂລກນີ້ ຍ່ອມສຶກສາສີລະປະກ່ຽວກັບຊ້າງແດ່ ມ້າແດ່ ຣົຖແດ່ ທະນູແດ່ ດາບແດ່ ຫລືສຶກສາສີລະປະຊັ້ນສູງຊັ້ນຕ່ຳແດ່ ຍ່ອມສຶກສາໃນສະມະນະຫລືພຣາມຜູ້ເຫັນຜິດ ຜູ້ປະຕິບັຕຜິດແດ່. ພິກຂຸທັງຫລາຍ ກາຣສຶກສານີ້ມີຢູ່ ເຮົາບໍ່ກ່າວວ່າບໍ່ມີ ກໍແຕ່ວ່າກາຣສຶກສານັ້ນເປັນຂອງທີ່ຕ່ຳຊາມ ເປັນຂອງຊາວບ້ານ ເປັນຂອງປຸຖຸຊົນ ບໍ່ປະເສີດ ບໍ່ປະກອບດ້ວຍປະໂຍຊນ໌ ບໍ່ເປັນໄປເພື່ອຄວາມເບື່ອໜ່າຍ ເພື່ອຄວາມຄາຍກຳນັດ ເພື່ອຄວາມດັບ ເພື່ອຄວາມສງົບ ເພື່ອຄວາມຮູ້ຍິ່ງ ເພື່ອກາຣຕຣັສຮູ້ ເພື່ອນິພພານ.

ພິກຂຸທັງຫລາຍ! ສ່ວນຜູ້ໃດມີສັທທາຕັ້ງໝັ້ນ ມີຄວາມຮັກຕັ້ງໝັ້ນ ມີສັທທາບໍ່ຫວັ່ນໄຫວ ມີຄວາມເຫລື້ອມໃສຢ່າງຍິ່ງ ຍ່ອມສຶກສາອະທິສີລແດ່ ອະທິຈິຕແດ່ ອະທິປັນຍາແດ່ ໃນທັມວິນັຍທີ່ຕະຖາຄົຕປະກາສແລ້ວ ກາຣສຶກສານີ້ເລີດກວ່າກາຣສຶກສາທັງຫລາຍ ຍ່ອມເປັນໄປເພື່ອຄວາມບໍຣິສຸທຂອງສັຕທັງຫລາຍ ເພື່ອກ້າວລ່ວງຄວາມໂສກແລະປະຣິເທວະ ເພື່ອຄວາມດັບສູນແຫ່ງທຸກຂ໌ແລະໂທມະນັສ ເພື່ອບັນລຸຍາຍະທັມ ເພື່ອກະທຳໃຫ້ແຈ້ງເຊິ່ງນິພພານ.

ພິກຂຸທັງຫລາຍ! ຂໍ້ທີ່ບຸຄຄົລຜູ້ມີສັທທາຕັ້ງໝັ້ນ ມີຄວາມຮັກຕັ້ງໝັ້ນ ມີສັທທາບໍ່ຫວັ່ນໄຫວ ມີຄວາມເຫລື້ອມໃສຢ່າງຍິ່ງ ຍ່ອມສຶກສາອະທິສີລແດ່ ອະທິຈິຕແດ່ ອະທິປັນຍາແດ່ ໃນທັມວິນັຍທີ່ຕະຖາຄົຕປະກາສແລ້ວ ນີ້ເຮົາຮຽກວ່າ ສິກຂານຸຕຕະຣິຍະ; ທັສສະນານຸຕຕະຣິຍະ ສະວະນານຸຕຕະຣິຍະ ລາພານຸຕຕະຣິຍະ ສິກຂານຸຕຕະຣິຍະເປັນດັ່ງນີ້.

ພິກຂຸທັງຫລາຍ! ກໍປາຣິຈະຣິຍານຸຕຕະຣິຍະເປັນຢ່າງໃດ? ຄື ບຸຄຄົລບາງຄົນໃນໂລກນີ້ ຍ່ອມບຳຣຸງກະສັຕແດ່ ພຣາມແດ່ ຄະຫະບໍດີແດ່ ບຳຣຸງຄົນຊັ້ນສູງຊັ້ນຕ່ຳ ບຳຣຸງສະມະນະຫລືພຣາມຜູ້ເຫັນຜິດ ຜູ້ປະຕິບັຕຜິດແດ່. ພິກຂຸທັງຫລາຍ ກາຣບຳຣຸງນີ້ມີຢູ່ ເຮົາບໍ່ກ່າວວ່າບໍ່ມີ ກໍແຕ່ວ່າ ກາຣບຳຣຸງນີ້ນັ້ນເປັນກາຣບຳຣຸງທີ່ຕ່ຳຊາມ ເປັນຂອງຊາວບ້ານ ເປັນຂອງປຸຖຸຊົນ ບໍ່ປະເສີດ ບໍ່ປະກອບດ້ວຍປະໂຍຊນ໌ ບໍ່ເປັນໄປເພື່ອຄວາມເບື່ອໜ່າຍ ເພື່ອຄວາມຄາຍກຳນັດ ເພື່ອຄວາມດັບ ເພື່ອຄວາມສງົບ ເພື່ອຄວາມຮູ້ຍິ່ງ ເພື່ອກາຣຕຣັສຮູ້ ເພື່ອນິພພານ.

ພິກຂຸທັງຫລາຍ! ສ່ວນຜູ້ໃດມີສັທທາຕັ້ງໝັ້ນ ມີຄວາມຮັກຕັ້ງໝັ້ນ ມີສັທທາບໍ່ຫວັ່ນໄຫວ ມີຄວາມເຫລື້ອມໃສຢ່າງຍິ່ງ ຍ່ອມບຳຣຸງຕະຖາຄົຕຫລືສາວົກຂອງຕະຖາຄົຕ ກາຣບຳຣຸງນີ້ເລີດກວ່າກາຣບຳຣຸງທັງຫລາຍ ຍ່ອມເປັນໄປເພື່ອຄວາມບໍຣິສຸທຂອງສັຕທັງຫລາຍ ເພື່ອກ້າວລ່ວງຄວາມໂສກແລະປະຣິເທວະ ເພື່ອຄວາມດັບສູນແຫ່ງທຸກຂ໌ແລະໂທມະນັສ ເພື່ອບັນລຸຍາຍະທັມ ເພື່ອກະທຳໃຫ້ແຈ້ງເຊິ່ງນິພພານ.

ພິກຂຸທັງຫລາຍ! ຂໍ້ທີ່ບຸຄຄົລຜູ້ມີສັທທາຕັ້ງໝັ້ນ ມີຄວາມຮັກຕັ້ງໝັ້ນ ມີສັທທາບໍ່ຫວັ່ນໄຫວ ມີຄວາມເຫລື້ອມໃສຢ່າງຍິ່ງ ຍ່ອມບຳຣຸງຕະຖາຄົຕຫລືສາວົກຂອງຕະຖາຄົຕ ນີ້ເຮົາຮຽກວ່າ ປາຣິຈະຣິຍານຸຕຕະຣິຍະ; ທັສສະນານຸຕຕະຣິຍະ ສະວະນານຸຕຕະຣິຍະ ລາພານຸຕຕະຣິຍະ ສິກຂານຸຕຕະຣິຍະ ປາຣິຈະຣິຍານຸຕຕະຣິຍະເປັນດັ່ງນີ້.

ພິກຂຸທັງຫລາຍ! ກໍອະນຸສສະຕານຸຕຕະຣິຍະເປັນຢ່າງໃດ? ຄື ບຸຄຄົລບາງຄົນໃນໂລກນີ້ ຍ່ອມຣະນຶກເຖິງກາຣໄດ້ບຸຕແດ່ ພະຣິຍາແດ່ ຊັພຍ໌ແດ່ ຫລືກາຣໄດ້ຫລາຍ ໄດ້ໜ້ອຍ ຍ່ອມຣະນຶກເຖິງສະມະນະພຣາມຜູ້ເຫັນຜິດ ຜູ້ປະຕິບັຕຜິດແດ່. ພິກຂຸທັງຫລາຍ ກາຣຣະນຶກນີ້ມີຢູ່ ເຮົາບໍ່ກ່າວວ່າບໍ່ມີ ແຕ່ວ່າກາຣຣະນຶກນີ້ນັ້ນເປັນຂອງຕ່ຳຊາມ ເປັນຂອງຊາວບ້ານ ເປັນຂອງປຸຖຸຊົນ ບໍ່ປະເສີດ ບໍ່ປະກອບດ້ວຍປະໂຍຊນ໌ ບໍ່ເປັນໄປເພື່ອຄວາມເບື່ອໜ່າຍ ເພື່ອຄວາມຄາຍກຳນັດ ເພື່ອຄວາມດັບ ເພື່ອຄວາມສງົບ ເພື່ອຄວາມຮູ້ຍິ່ງ ເພື່ອກາຣຕຣັສຮູ້ ເພື່ອນິພພານ.

ພິກຂຸທັງຫລາຍ! ສ່ວນຜູ້ໃດມີສັທທາຕັ້ງໝັ້ນ ມີຄວາມຮັກຕັ້ງໝັ້ນ ມີສັທທາບໍ່ຫວັ່ນໄຫວ ມີຄວາມເຫລື້ອມໃສຢ່າງຍິ່ງ ຍ່ອມຣະນຶກເຖິງຕະຖາຄົຕຫລືສາວົກຂອງຕະຖາຄົຕ ກາຣຣະນຶກເຖິງນີ້ເລີດກວ່າກາຣຣະນຶກເຖິງທັງຫລາຍ ຍ່ອມເປັນໄປເພື່ອຄວາມບໍຣິສຸທຂອງສັຕທັງຫລາຍ ເພື່ອກ້າວລ່ວງຄວາມໂສກແລະປະຣິເທວະ ເພື່ອຄວາມດັບສູນແຫ່ງທຸກຂ໌ແລະໂທມະນັສ ເພື່ອບັນລຸຍາຍະທັມ ເພື່ອກະທຳໃຫ້ແຈ້ງເຊິ່ງນິພພານ.

ພິກຂຸທັງຫລາຍ! ຂໍ້ທີ່ບຸຄຄົລຜູ້ມີສັທທາຕັ້ງໝັ້ນ ມີຄວາມຮັກຕັ້ງໝັ້ນ ມີສັທທາບໍ່ຫວັ່ນໄຫວ ມີຄວາມເຫລື້ອມໃສຢ່າງຍິ່ງ ຍ່ອມຣະນຶກເຖິງຕະຖາຄົຕຫລືສາວົກຂອງ ຕະຖາຄົຕ ນີ້ເຮົາຮຽກວ່າ ອະນຸສສະຕານຸຕຕະຣິຍະ; ທັສສະນານຸຕຕະຣິຍະ ສະວະນານຸຕຕະຣິຍະ ລາພານຸຕຕະຣິຍະ ສິກຂານຸຕຕະຣິຍະ ປາຣິຈະຣິຍານຸຕຕະຣິຍະ ອະນຸສສະຕານຸຕຕະຣິຍະເປັນດັ່ງນີ້.

ພິກຂຸທັງຫລາຍ! ອະນຸຕຕະຣິຍະ ໖ ປະກາຣນີ້ແລ.

ພິກຂຸເຫລົ່າໃດໄດ້ທັສສະນານຸຕຕະຣິຍະ ສະວະນານຸຕຕະຣິຍະ ລາພານຸຕຕະຣິຍະ ຍິນດີໃນສິກຂານຸຕຕະຣິຍະ ຕັ້ງຢູ່ໃນປາຣິຈະຣິຍານຸຕຕະຣິຍະ ຈະເຣີນອະນຸສສະຕິທີ່ປະກອບດ້ວຍວິເວກ ເປັນແດນກະເສມ ໃຫ້ເຖິງອະມະຕະທັມ ຜູ້ບັນເທີງໃນຄວາມບໍ່ປະມາທ ມີປັນຍາຮັກສາຕົນ ສັງຣວມໃນສີລ ພິກຂຸເຫລົ່ານັ້ນແລ ຍ່ອມຮູ້ຊັດເຊິ່ງບ່ອນເປັນທີ່ດັບທຸກຂ໌ຕາມກາລອັນຄວນ.