ໂອຣັມພາຄິຍະສັງໂຍຊນ໌ ໕ ແລະມັຄຄະປະຕິປະທາທີ່ເປັນໄປເພື່ອລະໂອຣັມພາຄິຍະສັງໂຍຊນ໌ ໕

The Buddha's words

ມັຊຊິມະນິກາຍ ມັຊຊິມະປັນນາສ ໑໓/໑໒໓-໑໒໘/໑໕໓-໑໕໙

ສມັຍໜຶ່ງ ພຣະຜູ້ມີພຣະພາຄປະທັບຢູ່ທີ່ພຣະວິຫາຣເຊຕະວັນ ອາຣາມຂອງທ່ານອະນາຖະບິນດິກະເສດຖີ ເຂຕພຣະນະຄອຣສາວັຕຖີ ໃນທີ່ນັ້ນແລ ພຣະຜູ້ມີພຣະພາຄໄດ້ຕຣັສຮຽກພິກຂຸທັງຫລາຍວ່າ ພິກຂຸທັງຫລາຍ! ພິກຂຸເຫລົ່ານັ້ນທູລຮັບພຣະຜູ້ມີພຣະພາຄແລ້ວ ພຣະຜູ້ມີພຣະພາຄໄດ້ຕຣັສວ່າ:

ພິກຂຸທັງຫລາຍ! ພວກເຈົ້າທັງຫລາຍຍັງຈຳໂອຣັມພາຄິຍະສັງໂຍຊນ໌ ໕ ທີ່ເຮົາສະແດງແລ້ວໄດ້ຫລືບໍ່?

ເມື່ອພຣະຜູ້ມີພຣະພາຄຕຣັສຢ່າງນີ້ແລ້ວ ທ່ານພຣະມາລຸງກະຍະບຸຕໄດ້ກຣາບທູລວ່າ ຂ້າແຕ່ພຣະອົງຄ໌ຜູ້ຈະເຣີນ ຂ້ານ້ອຍຍັງຈຳໄດ້ເຊິ່ງໂອຣັມພາຄິຍະສັງໂຍຊນ໌ ໕ ທີ່ພຣະຜູ້ມີພຣະພາຄຊົງສະແດງແລ້ວ.

ມາລຸງກະຍະບຸຕ! ກໍເຈົ້າຈຳໂອຣັມພາຄິຍະສັງໂຍຊນ໌ ໕ ທີ່ເຮົາສະແດງແລ້ວວ່າຢ່າງໃດ?

ຂ້າແຕ່ພຣະອົງຄ໌ຜູ້ຈະເຣີນ ຂ້ານ້ອຍຍັງຈຳໄດ້ເຊິ່ງໂອຣັມພາຄິຍະສັງໂຍຊນ໌ຄື ສັກກາຍະທິຕຖິ, ວິຈິກິຈສາ, ສີລັພພະຕະປຣາມາສ, ກາມະສັນທະ, ພະຍາບາທ, ທີ່ພຣະຜູ້ມີພຣະພາຄຊົງສະແດງແລ້ວ ຂ້າແຕ່ພຣະອົງຄ໌ຜູ້ຈະເຣີນ ຂ້ານ້ອຍຍັງຈຳໄດ້ເຊິ່ງໂອຣັມພາຄິຍະສັງໂຍຊນ໌ ໕ ທີ່ພຣະຜູ້ມີພຣະພາຄຊົງສະແດງແລ້ວຢ່າງນີ້ແລ.

ມາລຸງກະຍະບຸຕ! ກໍເຈົ້າຈຳໂອຣັມພາຄິຍະສັງໂຍຊນ໌ ໕ ເຫລົ່ານີ້ ທີ່ເຮົາສະແດງແລ້ວຢ່າງນີ້ແກ່ໃຜໜໍ?

ມາລຸງກະຍະບຸຕ! ພວກປະຣິພາຊົກອັນຍະເດຍຣະຖີຍ໌ຈັກໂຕ້ຖຽງ ດ້ວຍຄຳໂຕ້ຖຽງອັນປຽບດ້ວຍເດັກນີ້ໄດ້ບໍ່ແມ່ນຫລືວ່າ ແມ່ນແຕ່ຄວາມຄິດວ່າ ສັກກາຍະດັ່ງນີ້ ຍ່ອມບໍ່ມີແກ່ເດັກກຸມາຣອ່ອນທີ່ຍັງນອນຫງາຍຢູ່ ກໍສັກກາຍະທິຕຖິຈັກເກີດຂຶ້ນແກ່ເດັກນັ້ນໄດ້ຢ່າງໃດ ສ່ວນສັກກາຍະທິຕຖິອັນເປັນອະນຸສັຍເທົ່ານັ້ນ ຍ່ອມນອນຕາມແກ່ເດັກນັ້ນ. ແມ່ນແຕ່ຄວາມຄິດວ່າ ທັມທັງຫລາຍດັ່ງນີ້ ຍ່ອມບໍ່ມີແກ່ເດັກກຸມາຣອ່ອນທີ່ຍັງນອນຫງາຍຢູ່ ກໍຄວາມສົງໃສໃນທັມທັງຫລາຍຈັກເກີດຂຶ້ນແກ່ເດັກນັ້ນໄດ້ຢ່າງໃດ ສ່ວນວິຈິກິຈສາອັນເປັນອະນຸສັຍເທົ່ານັ້ນ ຍ່ອມນອນຕາມແກ່ເດັກນັ້ນ. ແມ່ນແຕ່ຄວາມຄິດວ່າ ສີລທັງຫລາຍດັ່ງນີ້ ຍ່ອມບໍ່ມີແກ່ເດັກກຸມາຣອ່ອນທີ່ຍັງນອນຫງາຍຢູ່ ສີລັພພະຕະປຣາມາສໃນສີລທັງຫລາຍຈັກເກີດຂຶ້ນແກ່ເດັກນັ້ນໄດ້ຢ່າງໃດ ສ່ວນສີລັພພະຕະປຣາມາສອັນເປັນອະນຸສັຍເທົ່ານັ້ນ ຍ່ອມນອນຕາມແກ່ເດັກນັ້ນ. ແມ່ນແຕ່ຄວາມຄິດວ່າ ກາມທັງຫລາຍດັ່ງນີ້ ຍ່ອມບໍ່ມີແກ່ເດັກກຸມາຣອ່ອນທີ່ຍັງນອນຫງາຍຢູ່ ກໍກາມະສັນທະໃນກາມທັງຫລາຍຈັກເກີດຂຶ້ນແກ່ເດັກນັ້ນໄດ້ຢ່າງໃດ ສ່ວນກາມະຣາຄະອັນເປັນອະນຸສັຍເທົ່ານັ້ນ ຍ່ອມນອນຕາມແກ່ເດັກນັ້ນ. ແມ່ນແຕ່ຄວາມຄິດວ່າ ສັຕທັງຫລາຍດັ່ງນີ້ ຍ່ອມບໍ່ມີແກ່ເດັກກຸມາຣອ່ອນທີ່ຍັງນອນຫງາຍຢູ່ ກໍພະຍາບາທໃນສັຕທັງຫລາຍຈັກເກີດຂຶ້ນແກ່ເດັກນັ້ນໄດ້ຢ່າງໃດ ສ່ວນພະຍາບາທອັນເປັນອະນຸສັຍເທົ່ານັ້ນ ຍ່ອມນອນຕາມແກ່ເດັກນັ້ນ.

ມາລຸງກະຍະບຸຕ! ພວກປະຣິພາຊົກອັນຍະເດຍຣະຖີຍ໌ຈັກໂຕ້ຖຽງ ດ້ວຍຄຳໂຕ້ຖຽງອັນປຽບດ້ວຍເດັກນີ້ໄດ້ບໍ່ແມ່ນຫລື?

ເມື່ອພຣະຜູ້ມີພຣະພາຄຕຣັສຢ່າງນີ້ແລ້ວ ທ່ານພຣະອານົນທ໌ໄດ້ກຣາບທູລພຣະຜູ້ມີພຣະພາຄວ່າ ຂ້າແຕ່ພຣະອົງຄ໌ຜູ້ຈະເຣີນ ເວລານີ້ເປັນກາລສົມຄວນ. ຂ້າແຕ່ພຣະສຸຄົຕ ເວລານີ້ເປັນກາລສົມຄວນທີ່ພຣະຜູ້ມີພຣະພາຄຄວນຊົງສະແດງໂອຣັມພາຄິຍະສັງໂຍຊນ໌ ໕ ພິກຂຸທັງຫລາຍໄດ້ຟັງຕໍ່ພຣະຜູ້ມີພຣະພາຄແລ້ວ ຈັກຊົງຈຳໄວ້.

ອານົນທ໌! ຖ້າຢ່າງນັ້ນ ເຈົ້າຈົ່ງຟັງ ຈົ່ງມະນະສິກາຣໃຫ້ດີ ເຮົາຈັກກ່າວ.

ທ່ານພຣະອານົນທ໌ທູລຮັບພຣະຜູ້ມີພຣະພາຄແລ້ວ ພຣະຜູ້ມີພຣະພາຄໄດ້ຕຣັສວ່າ:

ອານົນທ໌! ປຸຖຸຊົນຜູ້ບໍ່ໄດ້ສະດັບໃນໂລກນີ້ ບໍ່ໄດ້ເຫັນພຣະອະຣິຍະ ບໍ່ສລາດໃນທັມຂອງພຣະອະຣິຍະ ບໍ່ໄດ້ຮັບຄຳແນະນຳໃນທັມຂອງພຣະອະຣິຍະ, ບໍ່ໄດ້ເຫັນສັປບຸຣຸສ ບໍ່ສລາດໃນທັມຂອງສັປບຸຣຸສ ບໍ່ໄດ້ຮັບຄຳແນະນຳໃນທັມຂອງສັປບຸຣຸສ ມີຈິຕອັນສັກກາຍະທິຕຖິກຸ້ມຣຸມແລ້ວ ອັນສັກກາຍະທິຕຖິຄອບງຳແລ້ວ ແລະເມື່ອສັກກາຍະທິຕຖິເກີດຂຶ້ນແລ້ວ ຍ່ອມບໍ່ຮູ້ອຸບາຍເປັນເຄື່ອງສະລັດອອກເສຍໄດ້ຕາມຄວາມເປັນຈິງ ສັກກາຍະທິຕຖິກໍເປັນຂອງມີກຳລັງ ອັນປຸຖຸຊົນບັນເທົາບໍ່ໄດ້ແລ້ວ ຊື່ວ່າເປັນໂອຣັມພາຄິຍະສັງໂຍຊນ໌.

ປຸຖຸຊົນນັ້ນ ມີຈິຕອັນວິຈິກິຈສາກຸ້ມຣຸມແລ້ວ ອັນວິຈິກິຈສາຄອບງຳແລ້ວ ແລະເມື່ອວິຈິກິຈສາເກີດຂຶ້ນແລ້ວ ຍ່ອມບໍ່ຮູ້ອຸບາຍເປັນເຄື່ອງສະລັດອອກເສຍໄດ້ຕາມຄວາມເປັນຈິງ ວິຈິກິຈສາກໍເປັນຂອງມີກຳລັງ ອັນປຸຖຸຊົນບັນເທົາບໍ່ໄດ້ແລ້ວ ຊື່ວ່າເປັນໂອຣັມພາຄິຍະສັງໂຍຊນ໌.

ປຸຖຸຊົນນັ້ນ ມີຈິຕອັນສີລັພພະຕະປຣາມາສກຸ້ມຣຸມແລ້ວ ອັນສີລັພພະຕະປຣາມາສຄອບງຳແລ້ວ ແລະເມື່ອສີລັພພະຕະປຣາມາສເກີດຂຶ້ນແລ້ວ ຍ່ອມບໍ່ຮູ້ອຸບາຍເປັນເຄື່ອງສະລັດອອກເສຍໄດ້ຕາມຄວາມເປັນຈິງ ສີລັພພະຕະປຣາມາສກໍເປັນຂອງມີກຳລັງ ອັນປຸຖຸຊົນບັນເທົາບໍ່ໄດ້ແລ້ວ ຊື່ວ່າເປັນໂອຣັມພາຄິຍະສັງໂຍຊນ໌.

ປຸຖຸຊົນນັ້ນ ມີຈິຕອັນກາມຣາຄະກຸ້ມຣຸມແລ້ວ ອັນກາມຣາຄະຄອບງຳແລ້ວ ແລະເມື່ອກາມຣາຄະເກີດຂຶ້ນແລ້ວ ຍ່ອມບໍ່ຮູ້ອຸບາຍເປັນເຄື່ອງສະລັດອອກເສຍໄດ້ຕາມຄວາມເປັນຈິງ ກາມຣາຄະກໍເປັນຂອງມີກຳລັງ ອັນປຸຖຸຊົນບັນເທົາບໍ່ໄດ້ແລ້ວ ຊື່ວ່າເປັນໂອຣັມພາຄິຍະສັງໂຍຊນ໌.

ປຸຖຸຊົນນັ້ນ ມີຈິຕອັນພະຍາບາທກຸ້ມຣຸມແລ້ວ ອັນພະຍາບາທຄອບງຳແລ້ວ ແລະເມື່ອພະຍາບາທເກີດຂຶ້ນແລ້ວ ຍ່ອມບໍ່ຮູ້ອຸບາຍເປັນເຄື່ອງສະລັດອອກເສຍໄດ້ຕາມຄວາມເປັນຈິງ ພະຍາບາທກໍເປັນຂອງມີກຳລັງ ອັນປຸຖຸຊົນບັນເທົາບໍ່ໄດ້ແລ້ວ ຊື່ວ່າເປັນໂອຣັມພາຄິຍະສັງໂຍຊນ໌.

ອານົນທ໌! ສ່ວນອະຣິຍະສາວົກຜູ້ໄດ້ສະດັບແລ້ວ ໄດ້ເຫັນພຣະອະຣິຍະ ສລາດໃນທັມຂອງພຣະອະຣິຍະ ໄດ້ຮັບຄຳແນະນຳໃນທັມຂອງພຣະອະຣິຍະ, ໄດ້ເຫັນສັປບຸຣຸສ ສລາດໃນທັມຂອງສັປບຸຣຸສ ໄດ້ຮັບຄຳແນະນຳໃນທັມຂອງສັປບຸຣຸສ ມີຈິຕອັນສັກກາຍະທິຕຖິກຸ້ມຣຸມບໍ່ໄດ້ ອັນສັກກາຍະທິຕຖິຄອບງຳບໍ່ໄດ້ ແລະເມື່ອສັກກາຍະທິຕຖິເກີດຂຶ້ນແລ້ວ ຍ່ອມຮູ້ອຸບາຍເປັນເຄື່ອງສະລັດອອກເສຍໄດ້ຕາມຄວາມເປັນຈິງ ສັກກາຍະທິຕຖິພ້ອມທັງອະນຸສັຍ ອັນອະຣິຍະສາວົກນັ້ນຍ່ອມລະໄດ້.

ອະຣິຍະສາວົກນັ້ນ ມີຈິຕອັນວິຈິກິຈສາກຸ້ມຣຸມບໍ່ໄດ້ ອັນວິຈິກິຈສາຄອບງຳບໍ່ໄດ້ ແລະເມື່ອວິຈິກິຈສາເກີດຂຶ້ນແລ້ວ ຍ່ອມຮູ້ອຸບາຍເປັນເຄື່ອງສະລັດອອກເສຍໄດ້ຕາມຄວາມເປັນຈິງ ວິຈິກິຈສາພ້ອມທັງອະນຸສັຍ ອັນອະຣິຍະສາວົກນັ້ນຍ່ອມລະໄດ້.

ອະຣິຍະສາວົກນັ້ນ ມີຈິຕອັນສີລັພພະຕະປຣາມາສກຸ້ມຣຸມບໍ່ໄດ້ ອັນສີລັພພະຕະປຣາມາສຄອບງຳບໍ່ໄດ້ ແລະເມື່ອສີລັພພະຕະປຣາມາສເກີດຂຶ້ນແລ້ວ ຍ່ອມຮູ້ອຸບາຍເປັນເຄື່ອງສະລັດອອກເສຍໄດ້ຕາມຄວາມເປັນຈິງ ສີລັພພະຕະປຣາມາສພ້ອມທັງອະນຸສັຍ ອັນອະຣິຍະສາວົກນັ້ນຍ່ອມລະໄດ້.

ອະຣິຍະສາວົກນັ້ນ ມີຈິຕອັນກາມຣາຄະກຸ້ມຣຸມບໍ່ໄດ້ ອັນກາມຣາຄະຄອບງຳບໍ່ໄດ້ ແລະເມື່ອກາມຣາຄະເກີດຂຶ້ນແລ້ວ ຍ່ອມຮູ້ອຸບາຍເປັນເຄື່ອງສະລັດອອກເສຍໄດ້ຕາມຄວາມເປັນຈິງ ກາມຣາຄະພ້ອມທັງອະນຸສັຍ ອັນອະຣິຍະສາວົກນັ້ນຍ່ອມລະໄດ້.

ອະຣິຍະສາວົກນັ້ນ ມີຈິຕອັນພະຍາບາທກຸ້ມຣຸມບໍ່ໄດ້ ອັນພະຍາບາທຄອບງຳບໍ່ໄດ້ ແລະເມື່ອພະຍາບາທເກີດຂຶ້ນແລ້ວ ຍ່ອມຮູ້ອຸບາຍເປັນເຄື່ອງສະລັດອອກເສຍໄດ້ຕາມຄວາມເປັນຈິງ ພະຍາບາທພ້ອມທັງອະນຸສັຍ ອັນອະຣິຍະສາວົກນັ້ນຍ່ອມລະໄດ້.

ອານົນທ໌! ຂໍ້ທີ່ວ່າ ບຸຄຄົລຈັກບໍ່ອາສັຍມັຄຄະປະຕິປະທາທີ່ເປັນໄປເພື່ອລະໂອຣັມພາຄິຍະສັງໂຍຊນ໌ ໕ ແລ້ວຈັກຮູ້ ຈັກເຫັນ ແລະຈັກລະໂອຣັມພາຄິຍະສັງໂຍຊນ໌ ໕ ໄດ້ນັ້ນ ບໍ່ເປັນຖານະທີ່ມີໄດ້. ອານົນທ໌ ປຽບເໝືອນຂໍ້ທີ່ວ່າ ບໍ່ຖາກເປືອກ ບໍ່ຖາກມອກຂອງຕົ້ນໄມ້ໃຫຍ່ທີ່ຢຶນຕົ້ນມີແກ່ນ ແລ້ວຈັກຖາກແກ່ນນັ້ນ ບໍ່ເປັນຖານະທີ່ມີໄດ້ ສັນໃດ, ຂໍ້ທີ່ວ່າ ບຸຄຄົລຈັກບໍ່ອາສັຍມັຄຄະປະຕິປະທາທີ່ເປັນໄປເພື່ອລະໂອຣັມພາຄິຍະສັງໂຍຊນ໌ ໕ ແລ້ວຈັກຮູ້ ຈັກເຫັນ ແລະຈັກລະໂອຣັມພາຄິຍະສັງໂຍຊນ໌ ໕ ໄດ້ນັ້ນ ບໍ່ເປັນຖານະທີ່ມີໄດ້ ສັນນັ້ນ.

ອານົນທ໌! ຂໍ້ທີ່ວ່າ ບຸຄຄົລອາສັຍມັຄຄະປະຕິປະທາທີ່ເປັນໄປເພື່ອລະໂອຣັມພາຄິຍະສັງໂຍຊນ໌ ໕ ແລ້ວຈັກຮູ້ ຈັກເຫັນ ແລະຈັກລະໂອຣັມພາຄິຍະສັງໂຍຊນ໌ ໕ ໄດ້ນັ້ນ ຍ່ອມເປັນຖານະທີ່ມີໄດ້. ອານົນທ໌ ປຽບເໝືອນຂໍ້ທີ່ວ່າ ຖາກເປືອກ ຖາກມອກຂອງຕົ້ນໄມ້ໃຫຍ່ທີ່ຢຶນຕົ້ນມີແກ່ນ ແລ້ວຈັກຖາກແກ່ນນັ້ນ ຍ່ອມເປັນຖານະທີ່ມີໄດ້ ສັນໃດ, ຂໍ້ທີ່ວ່າ ບຸຄຄົລອາສັຍມັຄຄະປະຕິປະທາທີ່ເປັນໄປເພື່ອລະໂອຣັມພາຄິຍະສັງໂຍຊນ໌ ໕ ແລ້ວຈັກຮູ້ ຈັກເຫັນ ແລະຈັກລະໂອຣັມພາຄິຍະສັງໂຍຊນ໌ ໕ ໄດ້ນັ້ນ ຍ່ອມເປັນຖານະທີ່ມີໄດ້ ສັນນັ້ນ.

ອານົນທ໌! ປຽບເໝືອນແມ່ນ້ຳຄົງຄານ້ຳເຕັມປ່ຽມສະເໝີຂອບຝັ່ງ ກາກົ້ມລົງດື່ມໄດ້ ຄັ້ງນັ້ນ ບຸຣຸສຜູ້ມີກຳລັງໜ້ອຍ ຍ່ອມມາດ້ວຍຄວາມຫວັງວ່າ ເຮົາຈັກລອຍຕັດຂວາງກະແສນ້ຳແຫ່ງແມ່ນ້ຳຄົງຄານີ້ໄປໃຫ້ເຖິງຝັ່ງໂດຍສວັສດີໄດ້ ດັ່ງນີ້ ເຂົາຈະບໍ່ສາມາດລອຍຕັດຂວາງກະແສນ້ຳແຫ່ງແມ່ນ້ຳຄົງຄານີ້ໄປໃຫ້ເຖິງຝັ່ງໂດຍສວັສດີໄດ້ ສັນໃດ, ເມື່ອທັມອັນຜູ້ສະແດງໆຢູ່ແກ່ຜູ້ໃດຜູ້ໜຶ່ງ ເພື່ອຄວາມດັບສັກກາຍະ ຈິຕຂອງຜູ້ນັ້ນບໍ່ແລ່ນໄປ ບໍ່ເຫລື້ອມໃສ ບໍ່ຕັ້ງຢູ່ ບໍ່ນ້ອມໄປ ສັນນັ້ນເໝືອນກັນ. ບຸຣຸສມີກຳລັງໜ້ອຍສັນໃດ ຄວນເຫັນບຸຄຄົລນັ້ນ ສັນນັ້ນເໝືອນກັນ.

ອານົນທ໌! ປຽບເໝືອນແມ່ນ້ຳຄົງຄານ້ຳເຕັມປ່ຽມສະເໝີຂອບຝັ່ງ ກາກົ້ມລົງດື່ມໄດ້ ຄັ້ງນັ້ນ ບຸຣຸສຜູ້ມີກຳລັງ ຍ່ອມມາດ້ວຍຄວາມຫວັງວ່າ ເຮົາຈັກລອຍຕັດຂວາງກະແສນ້ຳແຫ່ງແມ່ນ້ຳຄົງຄານີ້ໄປໃຫ້ເຖິງຝັ່ງໂດຍສວັສດີໄດ້ ດັ່ງນີ້ ເຂົາຍ່ອມສາມາດລອຍຕັດຂວາງກະແສນ້ຳແຫ່ງແມ່ນ້ຳຄົງຄານີ້ໄປໃຫ້ເຖິງຝັ່ງໂດຍສວັສດີໄດ້ ສັນໃດ, ເມື່ອທັມອັນຜູ້ສະແດງໆຢູ່ແກ່ຜູ້ໃດຜູ້ໜຶ່ງ ເພື່ອຄວາມດັບສັກກາຍະ ຈິຕຂອງຜູ້ນັ້ນຍ່ອມແລ່ນໄປ ຍ່ອມເຫລື້ອມໃສ ຍ່ອມຕັ້ງຢູ່ ຍ່ອມນ້ອມໄປ ສັນນັ້ນເໝືອນກັນ. ບຸຣຸສຜູ້ມີກຳລັງສັນໃດ ຄວນເຫັນບຸຄຄົລນັ້ນ ສັນນັ້ນເໝືອນກັນ.

ມັຄຄະປະຕິປະທາທີ່ເປັນໄປເພື່ອລະໂອຣັມພາຄິຍະສັງໂຍຊນ໌ ໕

ອານົນທ໌! ພິກຂຸໃນທັມວິນັຍນີ້ ສງັດຈາກກາມທັງຫລາຍ ສງັດຈາກອະກຸສົລທັມທັງຫລາຍ ເພາະອຸປະທິວິເວກ (ອຸປະທິວິເວກາ) ເພາະລະອະກຸສົລທັມໄດ້ (ອະກຸສະລານັງ ທັມມານັງ ປະຫານາ) ເພາະຣະງັບຄວາມຄ້ານກາຍໄດ້ໂດຍປະກາຣທັງປວງ (ສັພພະໂສ ກາຍະທຸຕຖຸລລານັງ ປະຕິປປັສສັທທິຍາ) ບັນລຸປະຖົມຊານ ມີວິຕົກ ວິຈາຣ ມີປີຕິແລະສຸຂອັນເກີດແຕ່ວິເວກຢູ່ ເຂົາພິຈາຣະນາເຫັນທັມທັງຫລາຍຄື ຣູປ ເວທະນາ ສັນຍາ ສັງຂາຣທັງຫລາຍ ວິນຍານ ທີ່ມີຢູ່ໃນປະຖົມຊານນັ້ນໂດຍຄວາມເປັນຂອງບໍ່ທ່ຽງ (ອະນິຈຈະໂຕ), ເປັນທຸກຂ໌ (ທຸກຂະໂຕ), ເປັນດັ່ງໂຣຄ (ໂຣຄະໂຕ), ເປັນດັ່ງຫົວຝີ (ຄັນດະໂຕ), ເປັນດັ່ງລູກສອນ (ສັລລະໂຕ), ເປັນຄວາມລຳບາກ (ອະຄະໂຕ), ເປັນຂອງອາພາທ (ອາພາທະໂຕ), ເປັນອື່ນ (ປະຣະໂຕ), ເປັນຂອງຊຸດໂຊມ (ປະໂລກະໂຕ), ເປັນຂອງວ່າງເປົ່າ (ສຸນຍະໂຕ), ເປັນຂອງບໍ່ແມ່ນຕົວຕົນ (ອະນັຕຕະໂຕ). ເຂົາຍ່ອມເປື້ອງຈິຕອອກຈາກທັມເຫລົ່ານັ້ນ ຄັນເຂົາເປື້ອງຈິຕອອກຈາກທັມເຫລົ່ານັ້ນແລ້ວ ຍ່ອມນ້ອມຈິຕໄປໃນອະມະຕະທາຕວ່າ ທັມມະຊາຕນັ້ນສງົບ ທັມມະຊາຕນັ້ນປະນີຕ ຄື ທັມເປັນທີ່ສງົບແຫ່ງສັງຂາຣທັງປວງ ເປັນທີ່ສະລະຄືນເຊິ່ງອຸປະທິທັງປວງ ເປັນທີ່ສິ້ນໄປແຫ່ງຕັນຫາ ເປັນຄວາມຄາຍກຳນັດ ເປັນຄວາມດັບ ເປັນນິພພານ ດັ່ງນີ້. ເຂົາຕັ້ງຢູ່ໃນວິປັສສະນານັ້ນ ຍ່ອມບັນລຸທັມອັນເປັນທີ່ສິ້ນໄປແຫ່ງອາສະວະທັງຫລາຍ ຖ້າຍັງບໍ່ບັນລຸທັມອັນເປັນທີ່ສິ້ນໄປແຫ່ງອາສະວະທັງຫລາຍ ຍ່ອມເປັນໂອປປາຕິກະ ຈັກປະຣິນິພພານໃນພົພນັ້ນ ມີກາຣບໍ່ກັບມາຈາກໂລກນັ້ນເປັນທັມມະດາ ເພາະຄວາມຍິນດີ (ທັມມະຣາເຄນະຕາຍະ), ຄວາມເພີນ (ທັມມະນັນທິຍາ) ໃນທັມນັ້ນ ແລະເພາະຄວາມສິ້ນໄປແຫ່ງໂອຣັມພາຄິຍະສັງໂຍຊນ໌ ໕ ປະກາຣ. ອານົນທ໌ ມັຄຄ໌ (ມັຄໂຄ) ນີ້ແລ ປະຕິປະທານີ້ແລ ຍ່ອມເປັນໄປເພື່ອລະໂອຣັມພາຄິຍະສັງໂຍຊນ໌ ໕.

ອານົນທ໌! ອີກປະກາຣໜຶ່ງ ເພາະວິຕົກວິຈາຣສງົບຣະງັບໄປ ພິກຂຸຍ່ອມບັນລຸທຸຕິຍະຊານ ມີຄວາມຜ່ອງໃສແຫ່ງຈິຕໃນພາຍໃນ ເປັນທັມອັນເອກຜຸດຂຶ້ນ ບໍ່ມີວິຕົກ ບໍ່ມີວິຈາຣ ມີແຕ່ປີຕິແລະສຸຂອັນເກີດແຕ່ສະມາທິຢູ່ ໆລໆ

ອານົນທ໌! ອີກປະກາຣໜຶ່ງ ເພາະປີຕິສິ້ນໄປ ພິກຂຸເປັນຜູ້ມີອຸເປກຂາ ມີສະຕິສັມປະຊັນຍະ ສເວີຍສຸຂດ້ວຍກາຍ ຍ່ອມບັນລຸຕະຕິຍະຊານ ທີ່ພຣະອະຣິຍະເຈົ້າທັງຫລາຍສັນລະເສີນຜູ້ໄດ້ບັນລຸວ່າ ເປັນຜູ້ມີອຸເປກຂາ ມີສະຕິຢູ່ເປັນສຸຂ ໆລໆ

ອານົນທ໌! ອີກປະກາຣໜຶ່ງ ເພາະລະສຸຂແລະທຸກຂ໌ເສຍໄດ້ ແລະເພາະຄວາມດັບຫາຍໄປແຫ່ງໂສມະນັສແລະໂທມະນັສໃນກາລກ່ອນ ພິກຂຸຍ່ອມບັນລຸຈະຕຸຕຖະຊານ ອັນບໍ່ມີທຸກຂ໌ບໍ່ມີສຸຂ ມີແຕ່ອຸເປກຂາເປັນເຫຕໃຫ້ສະຕິບໍຣິສຸທຢູ່. ເຂົາພິຈາຣະນາເຫັນທັມທັງຫລາຍຄື ຣູປ ເວທະນາ ສັນຍາ ສັງຂາຣທັງຫລາຍ ວິນຍານ ທີ່ມີຢູ່ໃນຈະຕຸຕຖະຊານນັ້ນໂດຍຄວາມເປັນຂອງບໍ່ທ່ຽງ, ເປັນທຸກຂ໌, ເປັນດັ່ງໂຣຄ, ເປັນດັ່ງຫົວຝີ, ເປັນດັ່ງລູກສອນ, ເປັນຄວາມລຳບາກ, ເປັນຂອງອາພາທ, ເປັນອື່ນ, ເປັນຂອງຊຸດໂຊມ, ເປັນຂອງວ່າງເປົ່າ, ເປັນຂອງບໍ່ແມ່ນຕົວຕົນ. ເຂົາຍ່ອມເປື້ອງຈິຕອອກຈາກທັມເຫລົ່ານັ້ນ ຄັນເຂົາເປື້ອງຈິຕອອກຈາກທັມເຫລົ່ານັ້ນແລ້ວ ຍ່ອມນ້ອມຈິຕໄປໃນອະມະຕະທາຕວ່າ ທັມມະຊາຕນັ້ນສງົບ ທັມມະຊາຕນັ້ນປະນີຕ ຄື ທັມເປັນທີ່ສງົບແຫ່ງສັງຂາຣທັງປວງ ເປັນທີ່ສະລະຄືນເຊິ່ງອຸປະທິທັງປວງ ເປັນທີ່ສິ້ນໄປແຫ່ງຕັນຫາ ເປັນຄວາມຄາຍກຳນັດ ເປັນຄວາມດັບ ເປັນນິພພານ ດັ່ງນີ້. ເຂົາຕັ້ງຢູ່ໃນວິປັສສະນານັ້ນ ຍ່ອມບັນລຸທັມອັນເປັນທີ່ສິ້ນໄປແຫ່ງອາສະວະທັງຫລາຍ ຖ້າຍັງບໍ່ບັນລຸທັມອັນເປັນທີ່ສິ້ນໄປແຫ່ງອາສະວະທັງຫລາຍ ຍ່ອມເປັນໂອປປາຕິກະ ຈັກປະຣິນິພພານໃນພົພນັ້ນ ມີກາຣບໍ່ກັບມາຈາກໂລກນັ້ນເປັນທັມມະດາ ເພາະຄວາມຍິນດີ, ຄວາມເພີນ ໃນທັມນັ້ນ ແລະເພາະຄວາມສິ້ນໄປແຫ່ງໂອຣັມພາຄິຍະສັງໂຍຊນ໌ ໕ ປະກາຣ. ອານົນທ໌ ມັຄຄ໌ນີ້ແລ ປະຕິປະທານີ້ແລ ຍ່ອມເປັນໄປເພື່ອລະໂອຣັມພາຄິຍະສັງໂຍຊນ໌ ໕.

ອານົນທ໌! ເພາະລ່ວງຣູປສັນຍາໂດຍປະກາຣທັງປວງ ເພາະດັບປະຕິຄະສັນຍາ ເພາະບໍ່ໃສ່ໃຈໃນນານັຕຕະສັນຍາ ພິກຂຸຍ່ອມບັນລຸອາກາສານັນຈາຍະຕະນະ ໂດຍມະນະສິກາຣວ່າ ອາກາສບໍ່ມີທີ່ສຸດ. ເຂົາພິຈາຣະນາເຫັນທັມທັງຫລາຍຄື ເວທະນາ ສັນຍາ ສັງຂາຣທັງຫລາຍ ວິນຍານ ທີ່ມີຢູ່ໃນທັມນັ້ນໂດຍຄວາມເປັນຂອງບໍ່ທ່ຽງ, ເປັນທຸກຂ໌, ເປັນດັ່ງໂຣຄ, ເປັນດັ່ງຫົວຝີ, ເປັນດັ່ງລູກສອນ, ເປັນຄວາມລຳບາກ, ເປັນຂອງອາພາທ, ເປັນອື່ນ, ເປັນຂອງຊຸດໂຊມ, ເປັນຂອງວ່າງເປົ່າ, ເປັນຂອງບໍ່ແມ່ນຕົວຕົນ. ເຂົາຍ່ອມເປື້ອງຈິຕອອກຈາກທັມເຫລົ່ານັ້ນ ຄັນເຂົາເປື້ອງຈິຕອອກຈາກທັມເຫລົ່ານັ້ນແລ້ວ ຍ່ອມນ້ອມຈິຕໄປໃນອະມະຕະທາຕວ່າ ທັມມະຊາຕນັ້ນສງົບ ທັມມະຊາຕນັ້ນປະນີຕ ຄືທັມເປັນທີ່ສງົບແຫ່ງສັງຂາຣທັງປວງ ເປັນທີ່ສະລະຄືນເຊິ່ງອຸປະທິທັງປວງ ເປັນທີ່ສິ້ນໄປແຫ່ງຕັນຫາ ເປັນຄວາມຄາຍກຳນັດ ເປັນຄວາມດັບ ເປັນນິພພານ ດັ່ງນີ້. ເຂົາຕັ້ງຢູ່ໃນວິປັສສະນານັ້ນ ຍ່ອມບັນລຸທັມອັນເປັນທີ່ສິ້ນໄປແຫ່ງອາສະວະທັງຫລາຍ ຖ້າຍັງບໍ່ບັນລຸທັມອັນເປັນທີ່ສິ້ນໄປແຫ່ງອາສະວະທັງຫລາຍ ຍ່ອມເປັນໂອປປາຕິກະ ຈັກປະຣິນິພພານໃນພົພນັ້ນ ມີກາຣບໍ່ກັບມາຈາກໂລກນັ້ນເປັນທັມມະດາ ເພາະຄວາມຍິນດີ, ຄວາມເພີນ ໃນທັມນັ້ນ ແລະເພາະຄວາມສິ້ນໄປແຫ່ງໂອຣັມພາຄິຍະສັງໂຍຊນ໌ ໕ ປະກາຣ. ອານົນທ໌ ມັຄຄ໌ນີ້ແລ ປະຕິປະທານີ້ແລ ຍ່ອມເປັນໄປເພື່ອລະໂອຣັມພາຄິຍະສັງໂຍຊນ໌ ໕.

ອານົນທ໌! ອີກປະກາຣໜຶ່ງ ເພາະລ່ວງອາກາສານັນຈາຍະຕະນະໂດຍປະກາຣທັງປວງ ພິກຂຸຍ່ອມບັນລຸວິນຍານັນຈາຍະຕະນະ ໂດຍມະນະສິກາຣວ່າ ວິນຍານບໍ່ມີທີ່ສຸດ ໆລໆ

ອານົນທ໌! ອີກປະກາຣໜຶ່ງ ເພາະລ່ວງວິນຍານັນຈາຍະຕະນະໂດຍປະກາຣທັງປວງ ພິກຂຸຍ່ອມບັນລຸອາກິນຈັນຍາຍະຕະນະ ໂດຍມະນະສິກາຣວ່າ ບໍ່ມີອັນໃດໆ ເຂົາພິຈາຣະນາເຫັນທັມທັງຫລາຍຄື ເວທະນາ ສັນຍາ ສັງຂາຣທັງຫລາຍ ວິນຍານ ທີ່ມີຢູ່ໃນທັມນັ້ນໂດຍຄວາມເປັນຂອງບໍ່ທ່ຽງ, ເປັນທຸກຂ໌, ເປັນດັ່ງໂຣຄ, ເປັນດັ່ງຫົວຝີ, ເປັນດັ່ງລູກສອນ, ເປັນຄວາມລຳບາກ, ເປັນຂອງອາພາທ, ເປັນອື່ນ, ເປັນຂອງຊຸດໂຊມ, ເປັນຂອງວ່າງເປົ່າ, ເປັນຂອງບໍ່ແມ່ນຕົວຕົນ. ເຂົາຍ່ອມເປື້ອງຈິຕອອກຈາກທັມເຫລົ່ານັ້ນ ຄັນເຂົາເປື້ອງຈິຕອອກຈາກທັມເຫລົ່ານັ້ນແລ້ວ ຍ່ອມນ້ອມຈິຕໄປໃນອະມະຕະທາຕວ່າ ທັມມະຊາຕນັ້ນສງົບ ທັມມະຊາຕນັ້ນປະນີຕ ຄືທັມເປັນທີ່ສງົບແຫ່ງສັງຂາຣທັງປວງ ເປັນທີ່ສະລະຄືນເຊິ່ງອຸປະທິທັງປວງ ເປັນທີ່ສິ້ນໄປແຫ່ງຕັນຫາ ເປັນຄວາມຄາຍກຳນັດ ເປັນຄວາມດັບ ເປັນນິພພານ ດັ່ງນີ້. ເຂົາຕັ້ງຢູ່ໃນວິປັສສະນານັ້ນ ຍ່ອມບັນລຸທັມອັນເປັນທີ່ສິ້ນໄປແຫ່ງອາສະວະທັງຫລາຍ ຖ້າຍັງບໍ່ບັນລຸທັມອັນເປັນທີ່ສິ້ນໄປແຫ່ງອາສະວະທັງຫລາຍ ຍ່ອມເປັນໂອປປາຕິກະ ຈັກປະຣິນິພພານໃນພົພນັ້ນ ມີກາຣບໍ່ກັບມາຈາກໂລກນັ້ນເປັນທັມມະດາ ເພາະຄວາມຍິນດີ, ຄວາມເພີນ ໃນທັມນັ້ນ ແລະເພາະຄວາມສິ້ນໄປແຫ່ງໂອຣັມພາຄິຍະສັງໂຍຊນ໌ ໕ ປະກາຣ. ອານົນທ໌ ມັຄຄ໌ນີ້ແລ ປະຕິປະທານີ້ແລ ຍ່ອມເປັນໄປເພື່ອລະໂອຣັມພາຄິຍະສັງໂຍຊນ໌ ໕.

ຂ້າແຕ່ພຣະອົງຄ໌ຜູ້ຈະເຣີນ! ຖ້າມັຄຄ໌ນີ້ ປະຕິປະທານີ້ ຍ່ອມເປັນໄປເພື່ອລະໂອຣັມພາຄິຍະສັງໂຍຊນ໌ ໕ ເມື່ອເປັນຢ່າງນັ້ນ ເພາະເຫຕໃດ ພິກຂຸບາງພວກໃນພຣະສາສນານີ້ຈຶ່ງເປັນເຈໂຕວິມຸຕ ບາງພວກເປັນປັນຍາວິມຸຕໜໍ?

ອານົນທ໌! ໃນເຣື່ອງນີ້ ເຮົາກ່າວຄວາມຕ່າງກັນແຫ່ງອິນທຣີຍ໌ຂອງພິກຂຸເຫລົ່ານັ້ນ.

ພຣະຜູ້ມີພຣະພາຄໄດ້ຕຣັສພຣະພາສິຕນີ້ແລ້ວ ທ່ານພຣະອານົນທ໌ມີໃຈຊື່ນຊົມຍິນດີພຣະພາສິຕຂອງພຣະຜູ້ມີພຣະພາຄ ດັ່ງນີ້ແລ.